Koronabirusa dela eta, Alegiako Udalak Karmen festak bertan behera utziak zituen, baina, Festa batzordeak biharko eguna etxean ospatzeko egitaraua prestatu du.
Bihar, hilak 16, goizean balkoi dotoreenaren lehiaketako irabazleen berri emango dute udaletxeko webgunearen eta sare sozialen bidez. 16:00etan, Sutarri dantza taldeak prestatu duen bideo bat eskainiko da www.alegia.eus webgunean eta Facebook zein Twitterreko profiletan. Urtero egiten du jendaurreko emanaldia dantza taldeak, eta aurten beste modu batera egingo den arren, herritarrek emanaldiaz gozatzeko aukera izango dute. Eta eguna bukatzeko, 21:00etan balkoietan txintxarriak joz agurtuko dute eguna.
Udaletik herritarrei arduraz jokatzeko deia egin diete: "Jende pilaketak ekidin behar dira, eta maskararen erabilera gomendatzen da, segurtasun distantzia mantentzearekin batera".