Alegiako ikasleak udaletxearen aurrean kantuan ibili dira goizean. "Santa Agedan ohitura hala da eta gatoz eskatzera", abisatu dute. Lehenik Gaztelekua lehenbailehen martxan jartzea exijitu dute. Ondoren, farola gehiago jartzeko kaleetan. Azkenik, berriz, ondorengoa: "Alkateari ere egin nahi/genioke eskaera/igerileku on bat nahi degu/Tolosakoan antzera".
Udaletxetik eskolara itzuli dira ondoren. Bertan, zuzendariaren belarriak berotu dituzte: "Zuzendaria entzun mesedez/ikasleon eskaria/jangelan jarri ikasleontzat/itxurazko janaria". Abiadura gutxitu beharrean, azkartu egin dute ondoren makilak eskuan zituztela: "Eskolaz kanpo izan dezagun/patxaran non ibilia/patio handiagoa behar genuke/ta ahal bada estalia". Amaitzeko, patiorako material berria behar dutela jakinarazi die zuzendariari.