Alegian Elkartasun Eguna antolatu dute larunbaterako. Euskal preso eta iheslarien eskubideen aldeko eguna izango da, eta 13:00etan emango diote hasiera egunari. Lehenik eta behin ekitaldi bat egingo dute herriko plazan, eta jarraian, festa giroak emango die aldarrikapenerako aukera. Triki poteoak elkartuko ditu guztiak jai giroan murgilduz.
14:30ean herri bazkaria izango da, eta kasu honetan, Bulebarrerako bidea egingo dute. Antolatzaileek txartelak salgai jarriak dituzte herriko tabernetan, eta bazkarira joan nahi duenak gaur erosi beharko du txartela. Bazkariaren ostean, kantu saioa egingo dute, eta kantuaz gain bertsoek ere hartuko dute tokia. Herriko bertsolarien Kopla Lehiaketa izango da.
KONTZERTUAK GAZTETXEAN
20:30ean eta Bulebarretik mugitu gabe, zahagi ardoa egingo dute, eta nahi duenak bertaratzeko aukera izango du. Eta aldarrikapen egunari bukaera emateko kontzertuen txanda izango da gaztetxean. 22:30ean, herriko taldeak eta Dientes de Lunak joko dute. Ondoren, DJaren txanda izango da.