Iñaki Artolak 22-20 irabazi dio Peio Etxeberriari Beotibarren. Garaipen horrekin final-laurdenetarako sailkatu da alegiarra. 1-7 galtzen hasi da Artola, baina jokoa aldatu eta markagailua iraultzea lortu du, 9-7. Peio Etxeberriak, ordea, pilotari oso arriskutsua dela erakutsi du beste behin, eta 9-10ekoa lortu du. Hortik aurrera alegiarra nagusitu da, tantoak landuz eta aurkariaren hutsak bilatuz. 19-15ekoarekin partida erabakita zegoela zirudien, baina Etxeberriak 20na berdintzea lortu du. Azken tantoak, ordea, Artolaren aldera erori dira.
Peio Etxeberriak kanporaketa galdu arren, Urrutikoetxearen lekua hartuko du. Tanto gehien egin dituen galtzailea izan da Etxeberria kanporaketa honetan, eta horri esker egongo da ligaxkan. Bere lehen aurkaria Jokin Altuna izango da, urriaren 14an, Tolosako Beotibar pilotalekuan. Jaialdia 16:30erako dago iragarria.