Alegiako jaiak 2019

Iñaki Artolak etxean jokatuko du larunbatean

Alegiako festetan pilotari profesionalen jaialdia egongo da. Aurrean Artola eta Bengoetxea VI.ak neurtuko dituzte indarrak, Urretabizkaia II.a eta Erasun lagun dituztela. 18:00etan hasiko den jaialdian beste bi partida ere jokatuko dira: festetako txapelketako finalak.

Iñaki Artolak herritarren aurrean jokatuko du larunbatean, uztailak 13. Alegiarrak Urretabizkaia II.a izango du atzean. Aurkariak, aldiz, Oinatz Bengoetxea eta Jon Erasun izango dira. Pilota jaialdia 18:00etan hasiko da eta sarrera 15 euroan jarri dute.

Hiru partidaz osaturiko ikuskizuna antolatu dute Alegiako pilotalekuan. Aurreneko bi partidak Alegiako Festetako Pilota Txapelketaren finalak izango dira. Nesketan, palaz, Ainhoa Garmendia eta Maider Mendizabal izango dira alde batetik. Alegiarrak eta anoetarrak Amaia Irazustabarrena eta Itsaso Erasunen aurka jokatuko dute. Hernaniarra eta zizurkildarra azken bi hauek. Ondoren, eskuz mutilak ariko dira lehian. Jubenilen finalera ondorengoak iritsi dira: Aitor Altuna tolosarra eta Etxeberria albizturtarra alde batetik, eta Senar ataundarra eta Zalakain oiartzuarra bestetik. Jaialdiko hirugarren partida izango da profesionalena.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

BATAK BESTEA DAKAR


EGIN ATARIKIDE!