Alegiako Larraitz auzoko Mendebaldea eraberritzeko eta hiritartzeko lanak hasi dira. Atzo ekin zitzaien lanei eta udalaren aurreikuspenen arabera, urtebeteko epean amaituta izango dira.
Auzoko bizilagunak beraiek izan dira auzoaren etorkizuna nolakoa izango den aukeratu dutenak. Parte hartze prozesu batean, auzoari ikusten zizkioten gabeziak eta etorkizunean auzoak izan behar zuen itxuraren berri emateko aukera izan zuten herritarrek. Udalak horiek guztiak bildu eta proiektuaren arduradun teknikoei helarazi zizkien. Bi proposamen diseinatu ziren eta auzotarrek bozka bidez aparkalekuak lehenesten zituen aukera hobetsi zuten.
Gauzak horrela, auzoaren eraberritze oso bat egingo da. Alde batetik, aparkalekuen berrantolaketa bat egingo da aparkalekuak ezartzeko dagoen espazioa ahalik eta modurik eraginkorrenean aprobetxatzeko helburuarekin. Bestetik, irisgarritasunaren alorrean ere hobekuntzak egingo dira. Lurzorua plataforma bakarrean jarriko da eta gaur egun dauden koska eta irisgarritasunarekin lotura duten bestelako oztopoak ezabatuko dira. Horrekin batera, auzoko azpiegitura guztiak ere berritu egingo dira. Horien artean nabarmentzekoak dira ur zikinen saneamendua eta argiteria.
Lanek irauten duten bitartean, lanen gauzatzeak sortu ditzakeen hainbat eragozpenen aurrean, bizilagunei ulermena eskatu die udalak.
Auzotarrek erabaki moduan gauzatuko dira obrak; urtebeteko epean amaitzea aurreikusten da.
Ez diogu hau kapritxo hutsagatik: lagundu iezaguzu. Eduki hau guztia doan ikusten duzu ez dugulako irudikatzen euskarazko hitzik gabeko Tolosalderik. Atarikide, iragarle eta erakunde askoren laguntzarik gabe ezinezkoa litzateke. Zenbat eta komunitate handiagoa sortu, orduan eta sendoagoa izango da ATARIA: zurekin, zuekin. Ez utzi biharko gaur egin dezakezuna: egin zaitez Atarikide!
EGIN ATARIKIDE!