Nahi baino erantzun txikiagoa izan dute Alegiako Gaztetxean gaurko egunean, kontuan izanik Tolosako Gazte Egunarekin eta Herriarteko Bertso Txapelketarekin bat egin duela. Eguraldiarekin nahiko duda sartu zaizkie goizean, eta azkenean ez dira Langaurrera joan, pentsatuta zuten moduan, eta indoor kirolen txapelketak egin dituzte. Bazkaria gaztetxean egin dute eta gero tertulia egin dute gaztetxearen historiako hainbat argazkirekin. Bibalabirjen txarangarekin poteoa egitea izan da hurrengo ekitaldian eta gauean kontzertuak izango dituzte.
Alex Goikoetxea gaztetxeko kideak azaldu duenez, Gazte Egunaren helburua "jende berriari, atzetik datorren jendeari bidea irekitzea da, eta haiek ere gure antolatzeko modua eta dinamika hartzea. Gazteagoen inplikazio indartu nahian gabiltza". Aurrera begira ere, herriko festak gerturatzen ari direnez, deialdia egin diete gazteei gaztetxera joan eta bileretan eta ekitaldietan parte hartzeko. "Esan ohi den moduan, gaztetxea zurea dela sentitu behar duzu, gero eta gehiago inplikatzeko", gaineratu du Goikoetxeak.