Giro ederrean ari dira ospatzen Alegiko Gaztetxearen 29. urteurrena. Goizean, Altzoko BehiEKO Sabekoetxera irteera egin dute. Esne ekologikoa ekoizten dute bertan, eta bisita gidatua egin ondoren, hamaiketako "ederra" egin dute bertako produktuekin.
Eguerdian, urteroko ohiturari jarraituz, Babarrun Jatea egin dute. 60 lagun inguru elkartu dira bertan, eta Apalatxeren doinuek girotu dute bazkalostea.
19:00etan, Bibalabirjen txarangarekin kalejira egingo dute herrian, "festa giroa gaztetxetik herrira ateratzeko". Kalejiraren ondoren, afaltzeko aukera izango da gaztetxean, eta eguna bukatzeko Afu eta Skasti taldeen kontzertuak izango dira. Sarrera bost eurokoa izango da eta 22:00etan hasiko dira.
