Aurtengoan, Harri txikien Euskadiko txapelketa jokatu da eta Inhar Urruzuno ondarrutarrak jantzi du txapela. Lau harri ezberdinekin, errektangularra, kopa, kubikoa eta borobilarekin egin dute saio bana eta altxaldi bakarreko aldeagatik eskuratu du garaipena bizkaitarrak. Guztira 104 jasoaldi egin ditu Urruzunok, 103 Aimar Irigoienek, 94 Hodei Iruretagoienak eta 87 Iñigo Izagirrek.
Harri jasotzaileak burutu dituzten lanen artean, Joseba Otaegi eta Eneko Saralegi aizkolariek eskaini dute saioa. Bitartean plazan Joxelu Anaiekin dantza egiteko aukera izan da. Karmen jaiak hurrengo urtera arte agurtzeko, txintxarrien hotsarekin agurra egingo diete gaueko 00:00etan.