Kalkulagailuaren laguntzarekin, baina, Iñaki Artola finalerdietan da. Lehen Mailako Binakako Txapelketaren ligaxkako azken jardunaldia benetan borrokatua izan da. Hirugarren eta laugarren postu erabakigarriak airean zeuden; hiru bikote bi posturen borrokan. Azkenean, Bengoetxea VI-Untoriarentzat eta Artola-Albisurentzat izan dira finalerdietako azken bi txartelak. Hain juxtu, elkarren aurka jokatuko dute bikote horiek igandean. Ondoren, beste bi partida jokatu beharko ditu bikote bakoitzak. Finalerdietako ligaxkan lehen bi postuetan gelditzen direnak pasako dira finalera.