Horrez gain, aurrelari handi baten seriotasuna erakutsi du, eta argi, Oinatz Bengoetxea baino gehiago izan da. Hala eta guztiz ere, leitzarrak uneoro pilotari arriskutsua dela erakutsi du; txispa berezia dauka. Garaipen honekin, sei jardunaldiren faltan, bosgarrenari hiru partidako aldea ateratzen die Artola-Albisuk. Finalerdiak, beraz, esku eskura dituzte. Beotibarren jendetza elkartu da, eta 58 minutu iraun duen partidaz gozatu dute. Gorriek egin dute lehen tantoa, baina jarraian, Artolak hiru tanto egin eta 1-3 jarri dute markagailua. Launako eta bosnako berdinketen ondoren, urdinek aurrea hartu dute berriro, baina Oinatz Bengoetxeak bere maila erakutsi eta 12-8 jarri dira aurretik. Leitzarraren momentu onenak izan dira: artista! Atsedenaldiaren bueltan dena aldatu da, eta Artola izan da jaun eta jabe. Jokoa dominatzen hasi da alegiarra, eta horrez gain, tantoa erraz amaitzen. Amaieran, 13-22, eta zaletuen txalo zaparrada.