Oskar Zelarain euskal presoak egindako gurutze puntuko koadroen erakusketa batetik etorri da bestea. Goretti Eizmendi ikaztegietarrak Alegiako Erretirodunen tabernan koadroekiko interesa agertu zuen, eta berak ere gurutze puntuarekin egindako koadroak bazituela azaldu. «Horrela proposatu zidaten erakusketa jartzearena», azaldu du Eizmendik. Eta, egun, abenduaren bukaera arte bere hainbat lan ikusi daitezke Erretirodunen tabernan.
Orain zazpi urte hasi zen gurutze puntua lantzen eta azkeneko lana abuztuan amaitu zuen. Egunero ordubete inguru aritu izan da, eta berari erlaxatzeko balio izan dio. «Harrapatu egiten zaitu. Koadroa egiten ari zara, eta esaten diozu zure buruari azkeneko puntua emango duzula, baina gero kosta egiten da uztea», esan du. «Jostea bezala da, baina ezberdina, eskulan moduan hartu baitut, koadroak eginez».
30 lan inguru erakutsiko ditu; izan ere, zenbait koadro kendu eta beste batzuk jartzeko asmoa baitu. Horietako batzuk salgai daude. Eskulanak egiten oso gaztetatik aritu da Eizmendi, bai kakorratzarekin, bai makramearekin. Ondoren, eskulanen munduarekin jarraituz, hasi zen gurutze puntuarekin.