Alegian 1953ko uholdeek eragindakoa jaso zuten Rikardo Intxaustik eta bere seme Germanek argazkitan. Azken honen semeak, bere aitonak bezala Rikardo izenekoak, horietako hainbat digitalizatu ahal izan ditu. Interesa piztu dute irudiek eta argazki horien proiekzioa antolatu da biharko, urtarrilak 27. Kultur etxean izango da emanaldia eta 19:30ean hasiko da.
Argazkien proiekzioan Ixiar Intxausti izango da, Germanen arreba, irudietan ikusten dena azaltzen joateko. Oso ondo du gogoan Ixiar Intxaustik urte hartan gertatutakoa: «Ez zen batere ederra izan. Gogoan dut gure etxean afari-merienda egitekoak zirela kuadrilla bat gure tabernan. Afaria bertan behera geratu zen, tabernan ura sartzen hasi zelako». Susto larririk ere izan zuten uholde haietan Intxaustitarren etxean: «Baratzearen aldetik zetorren ura eta horra ematen zuen atea eusten genuen ura ez sartzeko. Azkenean leihoak hautsi eta hortik hasi zen sartzen ura eta segituan zeuden traste guztiak igerian. Eskaratza alderako atetik atera, baina ezin izan genion irekita eutsi, eta Iñaki anaia barruan geratu zen. Bizilagun batek aizkora ekarri zuen eta atea puskatuz justu-justu atera genuen gure aldera anaia».
Beldurra pasatu zutela du gogoan Ixiar Intxaustik. «Goiko pisura joan ginen eta handik atera zituen aitak argazkiak, bai ibaiaren aldera eta baita kalearen aldera ere. Argazkitan ondo ikusten da nolako maila hartu zuen urak».
Uraren maila jaitsi zenean, gerria baino gorainoko lokatza geratu zitzaien dendan, tabernan eta eskaratzan, eta kalean ere antzerakoa. «Herrian sekulako kalteak sortu zituen. Etxe barruetan zegoen lokatza kalera atera genuen herritarrek denak batera», dio Intxaustik.
Uholdeek sortutako hondamendia eta ondoren herritarrak nola aritu ziren lanean herria bere onera ekartzeko erakutsiko dute, beraz, asteartean emango duten proiekzioko argazkiek. Aukera ederra orain 62 urte izan zen gertakari hurak Alegian izan zuen eragina ezagutzeko.