Alegiako Udaleko gizarte zerbitzuek zaintzaileen behar sozioemozionalen inguruko ikastaroa antolatu dute azarorako eta abendurako, etxean menpekotasuna duten pertsonen zaintzaileei zuzendua. Matia Institutuko Sendian programak eskainitako ikastaroa da eta zaintzaren inguruko inplikazio emozional eta sozialetan gehiago barneratzeko eta zaintzaileen barne baliabideak hobetzen eta sakontzen joateko helburuarekin eskainiko da.
Zaintzailearen eguneroko errealitatea eta beharrak, lanean izaten diren pentsamendu mugatzaileak, komunikazioa eta pertsonen arteko harremanak, zaintzarekin elkarbizitzea, zaintzaren feminizazioa eta generoaren ikuspegia eta zaintzaileen jarrera proaktiboa aztertu eta landuko dira sei saio izango dituen ikastaroan.
Azaroaren 7an, 14an, 21ean eta 28an eta abenduaren 5ean eta 12an eskainiko da. 15:00etatik 17:30era izango dira saioak kultur etxean eta informazio gehiago nahi dutenek edo izena eman nahi dutenek, udaleko gizarte zerbitzuetara joan beharko dute edo 943 65 47 68 telefono zenbakira deitu.
Etxean menpekotasuna duten pertsonak zaintzen dituzten pertsonei zuzendurikoa da, eta azaroaren 7an hasiko da.
Ez diogu hau kapritxo hutsagatik: lagundu iezaguzu. Eduki hau guztia doan ikusten duzu ez dugulako irudikatzen euskarazko hitzik gabeko Tolosalderik. Atarikide, iragarle eta erakunde askoren laguntzarik gabe ezinezkoa litzateke. Zenbat eta komunitate handiagoa sortu, orduan eta sendoagoa izango da ATARIA: zurekin, zuekin. Ez utzi biharko gaur egin dezakezuna: egin zaitez Atarikide!
EGIN ATARIKIDE!