Albizturren Talo Jana izango dute bihar, urriaren 3an. Kulturaz eta gastronomiaz gozatzeko egitaraua prestatu dute elkarlanean Albizturko Udalak, Festa Batzordeak eta Arkaitz Elkarteak, eta arratsaldetik iluntzera hainbat jarduera izango dituzte.
Eskaintza Ibarrako Alurr dantza taldeak zabalduko du, Hamaikua izeneko ikuskizun berria egingo baitu 18:00etan. Egitarauaren izenburuari jarraiki, 20:00etan zabalduko dute postua Ataungo talogileek, eta taloak jateko aukera izango dute bertaratzen direnek. Amaitzeko, berriz, erromeria izango dute Oilar Beltzak musika taldearen eskutik.