Jende asko elkartu da arratsaldean Albizturko plazan. Udaberriko Festak ospatzen ari dira herrian, eta herri kiroletako saio berezia antolatu dute, herritarren parte hartzearekin. Lau bikote aritu dira lehian, eta aizkoran, harri jasotzen, txingak eramaten eta korrika aritu dira. Asier Aldalur eta Oier Aramendi bikoak egin dute denbora onena, 21:45ekin; bigarrenak Mikel Etxeberria eta Jon Ezeiza izan dira, 22.37rekin; hirugarren Xabier Telletxea eta Ander Dorronsoro, 23.41ekin; eta laugarrenak Asier Telleria eta Iñaki Orbegozo izan dira, 25.30eko denborarekin. Saioa girotzen Kimu txalapartariak izan dira. Desafioaren ondoren, zozketaren saridunak atera dira.
Ondoren festaren egitarauak jarraitu du, eta 150 pertsona elkartu dira afaltzeko frontoian. Erromeriarekin jarraituko dute, eta amaitzeko DJ Nazak girotuko du gaua.