Eguraldia alde izan ez badute ere, Albizturren, giro ederra izan dute pilotalekuaren bueltan. Askotariko sortzaile eta ekoizleen postuak izan dira bertan. Izan ere, gaur, Udaberri Azoka ospatu dute. Postuen artean izan dira, besteak beste, Ogi Ona, Izpiliku kosmetika, Urraki esnekiak, Pott zeramika, Sualma jostailuak, Zure apaingarriak, Luixiren pitxiak, Zei belarritakoak edota Baialabai.
Merkatua ez da izan, ordea, eguneko hitzordu bakarra, ardo zuri dastatzea ere egin baitute. Aurten laugarren edizioa izan du ekimenak, eta lau jatorri izendapenetako edariak dastatzeko aukera izan dute, hain zuzen, Errioxa, Albariño, Bierzo eta Getariako txakolina. Horrekin batera, mokadu baterako aukera ere izan dute bertaratu direnek.