Albizturren II. Erromeri Eguna egingo dute maiatzaren 17an. Erromerian hainbat musikari elkartuko dira, eta aurretik ere hainbat jarduera izango dituzte herrian.
Ospakizuna 12:00etan hasiko dute, herrian zehar egingo dute kalejirarekin. Ondoren, 14:00etan izango dute bazkaria, Euskal Parrillaren eskutik. Helduentzat zein haurrentzat menu berezituak izango dituzte, eta horietarako txartelak eskuratzeko azken eguna maiatzaren 13a izango da. Dagoeneko eskuragarri daude, udaletxean zein herriko ostatuan.
Eguneko hitzordu nagusia, berriz, 17:00etan hasiko da eta, erromeriaren barruan, oholtzaren gainera igoko dira, besteak beste, herriko ikasleak; Arandia anaiak; Alaitz Aramendi eta Garazi Zubizarreta; Malbadi anaiak; Maialen Larrañaga eta Irati Etxeberria; eta Ane Urbieta, Amets Etxaide zein Garazi Zubizarreta. Ondoren, «denen artean» ere jarraituko du erromeriak.