Albizturren bihartik —hilaren 10etik— datorren astelehenera —apirilaren 14ra— ospatuko dituzte Udaberri Festak. Bihar futbol txapelketarekin hasiko dira, eta jarduerarik gehienak ostiraletik igandera izango dira. Egun horietan denetariko eskaintza antolatu dute, besteak beste, dantza-emanaldiak, mendi irteera, erromeria, sagardo afaria, azoka eta ardo dastatzea.
Albizturko Festa Batzordeak antolatu du egitaraua, eta herritar gazteentzat zein helduentzat prestatu dituzte hitzorduak; sagardo-afarian, adibidez, bi publikoentzat egokitutako menuak antolatu dituzte. Igandeko azoka bigarrenez antolatu dute aurten, eta eskualdeko zein inguruko hainbat artisau izango dira bertan. Egitaraua borobiltzeko, berriz, erromeria izango dute Jon, Jaione eta seme-alaben eskutik.