Genodizioa Stop! Haustura Israelekin orain pankarta zabaldu dute Adunako plazan, estatu sionista Gazan egiten ari dena salatzeko. Hainbat adunar bildu dira plazara hiru herritarrek jotako adarraren deiari erantzunez. Sirena hotsekin abiatu dute ekitaldia eta plazaren erdian xingola beltza zeraman Palestinako bandera bat jarri dute. Haren gainean, hainbat herritarrek olibondo eta haritz adarrak jarri dituzte, bi herrien arteko elkartasun keinu bezala.
Jon Maiaren poema bat irakurri eta burrunbaren ondoren, Palestinako herriaren aldeko testu bat irakurri dute. Ekitaldia amaitzeko Eñaut Elorrietaren Gernika abestia kantatu dute elkarrekin, euskaraz eta arabieraz.