Iñaki Gorostidiren izen bera duen aurtengo harri jasotze txapelketa omenaldi bihurtu da. Izan ere, urtarrilean hil zen Iñaki Gorostidi eta aurtengo txapelketa aitzaki hartuta omenaldia egin dio herri kirol munduak eta Adunako herriak. Harri jasotzaile eta boxeolari moduan aritu zen Gorostidi, eta boxeoren eta herri kirolen ingurukoen hitz batzuekin hasi zen atzoko ekitaldia.
Hain justu, Millan Telleriaren bertsoek zabaldu zuten ekitaldia, eta ondoren, Manolo Kortajarena, Manu Maritxalar eta Iñaki Perurenak hartu zuten hitza. Tartean, lehendabizikoz egin zen Gorostidi harriaren bideoa proiektatu zuten.
Horren ostean, hainbat harri jasotzaile aritu ziren lehian; guztira 28 harri jasotzaile aritu ziren, tartean Aimar Irigoien izan zen, Gorostidi Harriaren hamabost edizioetatik hamabitan txapela lortutakoa. Horrez gain, aizkolariak ere izan ziren.
Euskaraldiaren harira, abesti bat ere abestu zuten, eta ekitaldiaren azken tartean, Iñaki Gorostidiren familiari oroigarriak eman zitzaizkien, besteak beste, Adunako Udalaren eta Muxkil elkartearen aldetik. Gorostidiren senideek eskuz egindako oroigarriak ere banatu zizkieten kirolari eta antolatzaile guztiei.
