Adunako Urtaki, Haizpea eta Uparan industriagunetatik pasatzen den GI-3610 errepidea eraberritzeko 750 mila euroko inbertsioa egingo du Adunako Udalak aurten. Kristina Rodriguez alkatearen iritziz ahalegin «handia» izango da udalarentzat, baina beharrezkoak dira egokitzapen lanak: «Trafiko handia izaten da bide horretan, Zizurkil eta Asteasuko industriagunera doazen kamioiak bertatik pasatzen dira eta N-1 errepidea kolapsatzen den bakoitzero bide hau erabiltzen dute ibilgailuek. Gastu ikaragarria dakar aldiro-aldiro errepidea berritzeak eta egoera honek irtenbidea behar zuen».
Gipuzkoako Foru Aldundiarekin hitzarmena sinatuta behin-betiko konponbidea emango diote GI-3610 errepideari. Bi fasetan egingo dituzte eraberritze lanak eta udalak hartu du lehen zatiaren ardura —Irizar lantegiaren biribilgunetik Elkar enpresaren parerainokoa—. Bigarren fasean, aldundiak konpromisoa hartu du Elkar enpresatik Adunako bidegurutzerainoko bidea egiteko.
«Hitzarmenean jasota dago errepide zati berria nondik egingo duten: orain moldatzen ari garen errepidea zuzen jarraituta, Arregi-Etxabe lantegiaren atzealdetik, bertan dagoen mendi kaskoa zulatuta. Guretzako hori da irtenbiderik egokiena, oraingo trazatuak —Todo Todo supermerkatu aurretik pasatzen denak— gorabehera gehiago ditu eta zailagoa da toki horretan oinezkoen segurtasuna bermatzea», esan du alkateak. Izan ere, hainbesteko trafiko duen edozein errepidek bete behar dituen baldintzetara errenditu beharko dute GI-3610 errepidea, zabalerari, argiztapenari eta espaloien ezaugarriei dagokionez.
Behin lanak amaituta, Gipuzkoako Foru Aldundiaren esku geratuko da errepidearen mantenua. «Urte askotako borroka izan da eta lortu dugu. Gurea bezalako udalerri txiki batentzat ia ezinezkoa da horrelako errepide batek eskatzen dituen ardurak betetzea». Martxoaren 10ean hasi zituzten lehen faseko lanak eta bost bat hilabete iraungo dutela aurreikusi dute. Bitartean Urtaki eta Haizpea industriaguneetarako sarbidea Andoaindik egin beharko dute erabiltzaileek eta Villabonatik, berriz, Uparan industriagunerakoa. «Enpresa eraikitzaileak bermatu digu N-1 errepidea trabatu eta bide alternatiboren bat zabaldu behar den guztietan saiatuko direla errepidea behin-behinean irekitzen».
KAMIOKO ETXEBIZITZAK
Neurri batean, aurtengo diru kontuak baldintzatuko ditu errepidearen konponketak, baina baita beste egitasmo batek ere: Kamio eremuko etxebizitza proiektuak. Promotore bat arduratu da orain arte egitasmoaz, eta, udalarekin adostuta, 18 etxebizitza tasatu eta 2 libre saldu dira —dagoeneko zozkatuta daude—. Aurreko urte amaieran promotoreak jakinarazi zuen ez zuela proiektuarekin aurrera jarraituko eta, honenbestez, udalak falta zitzaien terreno zatia erosteko erabakia hartu zuen: «Mila ate jo eta gero ikusi genuen bide bakarra hori zela. Guretzako ezinbestekoa da etxebizitza horiek egitea, udalak gisa honetako promozioak egiteko aukera bakarra delako, behintzat HAPOa berritu bitartean. Izena emanda dauden gehienak herriko gazteak dira, bizitza Adunan egiten dutenak, eta udaletik ezin diegu bizkarra eman hemen geratzeko hautua egin duten gazteei».
Udala une honetan balorazio teknikoa egiten ari da, aurretik promotoreak egindako proiektua eskuratu eta egokituko du. «Saiatuko gara aurretik adostutakoak mantentzen. Denbora pasa da eta prezioak garestitu egin dira. Etxeen salmenta prezioa bere horretan mantentzen ahaleginduko gara edo bestela oso gutxi igotzen, ez dadin gazte horietako bakar bat ere atzean geratu», esan du Rodriguezek.
Behin azterketak eginda, obren lizitazioa aterako du udalak eta espero du lanak esleituta edukitzea uda ingururako. Gero, pare bat urtetan iraungo dute eraikitze lanek.
KONTZIENTZIAZIOA BULTZATUZ
Europar Batasuneko zuzentarauari jarraituz 2025etik aurrera, hondakinen kudeaketarako gastu guztiak tasen bidez estali behar dituzte udalek. Adunan, gainerako udalerrietan bezala, igoera izango du tasak eta garestitzearen inguruko azalpenak emateko herri batzarrak egingo dituzte. Industriagunekoekin atzo egin zuten, eta gaur 10:00etan, eta bihar 18:00etan batzar irekiak egingo dituzte herritarrekin. «Orain arte ongi kudeatu ditugu hondakinak Adunan baina antzematen ari gara zabor poltsak behar ez diren tokian azaltzen hasi direla. Uste dugu kontzientziazioan eragin behar dugula». Duela gutxi jarri dute minigarbigunea herrian eta aurki aldatuko dituzte konpostatzeko guneak. Aldaketa hauen inguruko informazioa emango dute bileretan.
Horrekin batera, udalak kultur teknikariaren jarduna luzatuko du aurten, teknikari eta liburuzain gisa egiten dituen lanei beste eginkizun bat gehitzeko: «Ikusi dugu, gazteekin eta 60 urtetik gorakoekin lanketa berezi bat egin beharra dagoela. Haien beharrak aztertu eta haien neurriko eskaintza egin behar du udalak. Beste udalerrietan adin talde horientzako egiten diren eskaintzak ikusi eta teknikariaren laguntzarekin gurera nola ekarri ditzakegun aztertuko dugu», esan du alkateak.
Bide batez, euskararen inguruan kontzientziazioa bultzatzeko beharra ere ikusten du Rodriguezek, geroz eta gehiago sumatzen baitu herrian jendea erdaraz. «UEMArekin bildu eta zein neurri edo kanpaina antolatu ditzakegun aztertuko dugu». Konpromisoaren adibide bezala, aurrekontuan euskarari bideratutako diru-saila handitu egin du udalak.