Atzo eman zuten jakitera Adunako Irizar E-mobility enpresako langileek zuzendaritzarekin aurreakordioa dutela. Gaurko Elkartasun Eguna dute deituta Andoainen, eta hasiera batean manifestazioa egin behar bazuten ere, elkarretaratzea egin dute azkenean, eta une honetako egoeraren berri eman eta babesa eskaini dietenei eskerrak emateko baliatu dute. Langileak "pozik" azaldu dira eta aurreakordioaren inguruko balantze positiboa egin dute, "batez ere egoera desblokeatu delako".
Maider Herreros langileak azaldu duenez, azken hiru egunetan izan dituzten bilera "neketsuetatik" enpresaren lan baldintzak hobetzeko balio duen "aurreakordio on bat" hitzartu dute. Hori bai, argi utzi du greba batzarrean berretsi behar dela aurreakordio hori, eta ituna sinatu bitartean greban jarraituko dutela.
Unai Goikoetxea langileak zehaztu duenez, hamazazpigarren greba egunean Adunako enpresako kudeatzailea ez den zuzendaritzako beste kide batekin bildu ziren: "Nahiz eta aurrez ez ekarri guk negoziaketan aurrera egiteko eskatutako bost baldintzak, ez genion bilerara joateari uko egin, eta bertan, bost baldintza horiek bermatuko dituen itun proposamen bat osatu genuen". Goikoetxearen arabera, aurrerapauso bat eman da, egoera desblokeatu delako eta negoziazioa martxan dagoelako; "enpresak inmobilismoa baztertu du, eta mahaian eseri dira. Hori da eskatzen genuena, baina, jarrera horrekin urtarriletik etorri behar zuten, eta ez orain, hamazazpi egun greban egon ostean".
Lortutako akordioei dagokienez, oinarrizko puntuetan adostasuna lortu dutela esan du Goikoetxeak, baina oraindik hainbat puntu geratzen direla zehazteko. Hain justu, astelehenean bilduko dira berriro, negoziaketekin jarraitzeko.
Herrerosek, bestalde, greba izaten ari den "arrakasta" goraipatu du: "lehen egunetik ekoizpena geldituz eta egunetik egunera jende gehiago inguratuz, 180 izateraino". Eta, zuzendaritzak pausoa emateko ezinbestekotzat jo ditu "180 grebalariek izan duten konpromisoa eta jarrera, eragile sozial eta politikoek eragindako presioa eta herri hedabideek egindako jarraipena".
Irizar taldeko Alconza enpresako (Berango, Bizkaia) grebalariak ere izan dira Andoainen antolatu duten Elkartasun Egunean, eta babesa azaldu diete, gogoratuz bi hilabete daramatzatela borrokan, bertan izan diren 25 kaleratzeen kontra. Hala, datorren ostiralean, hilaren 20an, Berangon egingo duten manifestaziora joateko deia egin dute, "argi geratu baita langileen borroka eta sakrifiziorik gabe ez dagoela lorpenik".
