Ur jokoak, atsedenlekurako mahaiak, nagusientzako ariketak egiteko gailuak, iturria, komun publiko berria eta berdegunea aurki daitezke Adunako Udalak gaur arratsaldean zabaldu duen parke berrian. Herritar ugari elkartu da, eremu berria ikusi eta jarri dituzten elementuez gozatzera.
Haurrak izan dira gehien gozatu dutenak. Taldeka ur jokoetan ibiltzeko aukera izan dute, eguraldia lagun. Egunero izango da ur jokoetan ibiltzeko aukera: 11:00etatik 20:00etara bitartean izango da martxan, eta Josu Amilibia Adunako alkateak azaldu duenez, sakagailua sakatuta lau minutu irauten dute ur txorrotek.
Parkearen kostua, 300.000 euro ingurukoa izan da eta bi diru laguntza jaso dituzte Eusko Jaurlaritzako Ekonomia Garapen, Jasangarritasun eta Ingurumen sailetik: 146.000 euro Erein programatik eta 80.000 garapen jasangarrirako ekintzetatik.
