Hondakinen kudeaketari dagokionez lortutako emaitzak "ezin hobeak" direla aipatu du Adunako Udalak eta hori herritar guztien lan "zoragarriari" esker izan dela nabarmendu du.
Tolosaldeko Mankomunitateak emandako datuen arabera, urtarrila, otsaila eta martxoan, guztira, 30.549 kilo hondakin sortu dira Adunan. Gaikako bilketa tasa, beraz, %82,40koa izan da. Horrekin batera, konpostatutako hondakin organikoaren estimazioa ere egin dute, eta egindako kalkuluen arabera, 9.440 kilo hondakin organiko sortu eta konpostatu dira. Honenbestez, sortutako eta konpostatutako 39.989 kiloak kontuan hartuta, hondakinen %86,55 bideratzen dute adunarrek prebentziora edo birziklatzera.
Adunako Udalak herritarrak zoriondu ditu hondakinen kudeaketan agertu duten konpromisoagatik.