Uztailean egin zuten Asvinenearen agur festa, baina, proiektua ez zen hor geratu, kokapena eta izena aldatuta, lanean ari baitira berriro, ikasturte berrirako eskaintza prestatzen.
Zirkuola jarri diote izena zirkua eta arte eszenikoak euskaraz sustatzen dituen lantegiari, eta kokapenari dagokionez, Asvinenea zenaren parean dago egoitza berria. Bada, lokal berriaren egokitzapen lanak bukatu ostean, urrian hasi asmo dute euren eskaintzarekin. «Zirkuak eta kulturak inoiz baino gehiago behar gaituen une honetan», berrikuntza ugarirekin datozela iragarri dute antolatzaileek.
Batetik, zirku eskolaren barruan, haur, gazte eta helduei zuzendutako zirku ikastaro jarraia izango da, urritik maiatzera bitarte. Aldizkako formakuntza zehatzak ere eskainiko dituzte, hasiberri, amateur edota profesionalentzako. Kasu honetan, zirkua, dantza, antzerkia eta arte eszenikoekin lotutako formakuntza egun bakarrekoa, asteburukoa edota epe jakin batekoa izan daiteke. Zirku eskolaren barruan, zirkua familian aukera ere jarri dute herritarren eskura. «Familiako kideek elkarrekin eta familia ezberdinekin bi orduko zirku saio bat elkarbanatzean datza, eta hilean behin larunbat goizetan eskainiko dira».
Bestalde, zirku eskolaz gain, entrenamendu espazioa ere jarriko dute eskura. «Artista, amateur, profesional edota zirkuaren praktika gustuko dutenek lan egiteko, entrenatzeko zein entsegurako egokitutako espazioa izango da».
Internet bidez eman ahalko da izena formakuntza edo ikastaro desberdinetan, eta zalantzetarako, 611 627 782 zenbakira deitu ahalko da.