San Joan sua bertan behera uztearekin batera, Adunako Udalak gogoratu du COVID-19aren krisiaren ondorioz hondakinen bilketan egindako aldaketak bertan behera geldituko dira ekainaren 28tik aurrera. Ondorioz, errefusa berriro ere etxeko atarietan jasoko da bakoitzak duen kubo grisetan, eta honbestez errefusaren edukiontziak kendu egingo dira.
Udalak ohartarazi du etorkizunean, herrian COVID-19 kasurik suertatzen bada, edo isolamenduan pertsona edo familiaren bat egon beharko balu, modu berezian kudeatu beharko dela beraien errefusa. "Gertatuko balitz, udalera deitu beharko da, protokoloa martxan jarriko genuke eta eman beharreko pausoak herritarrari azalduko zaizkio".
Alarma egoera bertan behera geldituko denez, herriko azpiegitura eta zerbitzuen egoera honakoa izango da:
- PARKEAK, FRONTOIA ETA KIROL PISTA
Frontoia, Kirol pista eta parkeak erabiltzeko aukera egongo da berriz ere. Hala ere, arduraz jokatzea eta osasun sailetik eman diren gomendioak betetzea eskatu du udalak.
- ITURRIAK ETA KOMUNA
Herriko iturriak eta frontoiko komun publikoa irekiko dira.
- HAURREN LOKALA
Lokalak, oraingoz, itxita jarraituko du
- LIBURUTEGIA
Irekita dago baina higiene neurri bereziekin eta urruntze soziala errespetatuz funtzionatuko du.
UDALETXEA
Irekita egongo da baina higiene neurri bereziekin eta urruntze soziala errespetatuz funtzionatuko da.
- GAINERAKO LOKALAK
Erabiltzeko aukera egongo da baina urruntze sozialeko neurriak bermatuz.