Adunako Udalak hainbat ohar zabaldu ditu herriko jaien harira:
Abuztuaren 10etik aurrera, eta jaiek irauten duten bitartean, herriko leiho eta balkoiak ikurriñarekin apaintzea eskatu du udalak. Bide batez, igandean, abuztuaren 11n ospatuko den landare lehiaketa dela eta, landareak 12:00etarako plazara eramateko eskatu dute antolatzaileek.
Festak irauten duen bitartean, hainbat bazkari eta afari egingo dira eta izen emateko aukera dago egunotan. Abuztuaren 14an, esate baterako, herri afaria izango da frontoian eta txartela erosteko azken eguna, abuztuaren 8a izango da, Uztartza jatetxean. Umeek abuztuaren 17an Txulobin egingo duten bazkarirako txartelak ere bertan egongo dira eskuragai abuztuaren 11ra arte.
Eta amaitzeko, abuztuaren 17an, 60 urtetik gorakoen bazkaria Uztartzan izango dela jakinarazi du udalak eta oilasko biltzaileena, berriz, sagardotegian.