Iritsi dira Adunako Ama Birjin jaiak ere! Txupinazoa eguerdian bota badute ere, goiz goizetik hasi dute festa giroa hainbat herritarrek: 20 gazte inguru baserriz baserri ibili dira oilaskoak biltzen.
12ak aldera ailegatu dira plazara, eta fandangoa dantzatu ondoren, bota dute suziria; Txekor Jate eguna antolatzen dutenek izan dute horretarako ohorea. Ondoren, buruhandiak atera dira eta herriko txikienen atzetik aritu dira korrika.
Bitartean, azkeneko etxeetara joan dira oilasko biltzaileak, eta 13:30ak aldera, oilasko jokoa eta I. urrezko oilaskoaren jokoa egin dituzte. Goizean bildu dituzten oilaskoen artean hoberena zein den aukeratu behar izan dute herritarrek. Bentaberri baserriak irabazi du 3,5 kilogramoko oilaskoarekin. Ondoren, plastikozko oilaskoen jokoa egin dute.
Ikusi hemen datozen ordu eta egunetako egitaraua.
