Adunako Euskararen Aldeko Taldetik eskerrak eman nahi dizkiete maiatzaren 22an eguraldia kontra izanik ere, lip dub-aren grabaketan parte hartu zuten eta lagundu zuten adunar guztiei. "Ea, beste batzuen artean, ekimen honi esker hemendik aurrera Adunan, euskararen normalizazioan aurrera pauso bat ematen dugun eta herrian euskararen erabilera guztion artean bermatzen dugun", esan dute taldetik.
San Joan bezpera baliatu nahi dute dagoeneko eskuartean duten grabaketa argitara emateko. Kultur aretoan botako dute lib dub-aren grabazioa, 19:30ean hasita. Ikus-entzunezkoa ikusteaz gainera, paraleloki egin ziren argazkiak eta ipuina ikusgai izango dira.
Emanaldiaren ondoren, San Joan sua piztera hurbilduko dira herritarrak kalejiran, Uztartza ondoko aparkalekura. "Bertan euskararekiko dauzkagun mamuak izango ditugu eta norberak bere burua identifikatzen duen mamua bota ahal izango du suak erre dezan". Euskararen Aldeko Taldeak, esan duenez, bitartean "Euskaratxo maitasunez elikatzen jarraituko dugu".