Gorostidi Harriaren X. Txapelketa igandean jokatuko da, Adunan, 18:00etan. Sarrera borondatea izango da. Aurtengo edizioa berezia izan daiteke, izan ere, Iñaki Gorostidiren erronka harri jasotzaileren batek hartuko duela espero da. Baina aurrez, txapelketa jokatuko da, eta lehian, hamar harri jasotzaile ariko dira. Haimar Irigoien tartean den gehienetan bezala, faboritoa errezildarra izango da. Besteak hauek izango dira: Ostolaza, Urrutia, Ugartemendia, Kortaberri, Galarraga, Izeta IV.a, Telleria, Izeta III.a eta Eizmendi.
Egin beharreko lanari dagokionez, harri jasotzaile bakoitzak bi jasoaldi eman beharko dizkie Iñaki Gorostidi berak jarritako bost harriei. Txikienak, baina baldarrenak, 139 kiloko pisua du. Handienak, aldiz, 175 kilokoa. Gorostidi berak urtero egin beharreko lana aldatu egiten du, harri desberdinak jarriz. Horrela, 10 urte hauetan hamar ariketa desberdin jarri ditu adunarrak.
Bestalde, Gorostidi Harriaren barruan erronka berezi bat dago, orain arte inork egin ez duena: esku bakarrarekin 185 kiloko zilindro zaharra jasotzearena. Gorostidik 77 kilo zituela lortu zuen marka izugarri hori. Igandean jasotzen duenak 500 euro eramango ditu etxera. Eta hasieran esan bezala, aurten bai, badirudi bateren bat saiatuko dela.
[Ikusi pasa den urteko edizioaren argazki galeria zabala]
