Unipapel enpresako langileek euren egoera salatu dute

Adunako Unipapel S.L.U.ko enpresa batzordeak bere «ezinegon, frustrazio eta haserrea» adierazi ditu, orain dela bi urte Adveok Springwater Capital-i industria jarduera saldu zionetik hona «jasaten ari garen egoeragatik».

Enpresa batzordetik gaineratu dutenez, «bien artean den komunikazio txarrak, bi aldeek kontratua ez bete izanak, produkzioaren eteteak eta Springwater Capital-ek nominak ez ordaintzeak, egoera are larriagoa egiten dute». Gogora ekarri dute sektorean puntako enpresa izan zenak, eta ondorioz, marka propioa eta bezero finkoak, egun ez duela ia jarduera industrialik, «honek suposatzen duen guztiarekin».

Enpresa batzorde ezberdinak (Aduna, Madril, Logroño) jabearekin biltzeko saiakera ezberdinak egin ostean, Springwater Capital-ek bilera batera deitu zituzten Madrileko bere bulegoetan pasa den martxoaren 14an. «Bilera horretan, ardura guztia Adveoren gain jartzen da eta bertan bildutakoei baieztatzen zaie Springwater-ek Unipapel S.L.U.ren aldeko apustua egiten duela eta soldatetan, paga eta nominak, ez duela hutsik egingo».

Egun batzuk beranduago, ordea, enpresa batzordetik azaldu dutenez, «Unipapel S.L.U.ko langileok ez dugu nomina jasotzen eta honen aurretik beste ordainketa batzuetan atzerapenak jasan genituen».

Gertakari hauek direla eta, Unipapel S.L.U.ko hiru fabriketako langileek Adveo eta Springwater Capital-i eskatzen diete «beraien arteko ezberdintasunak konpondu ditzatela eta jarduera industriala lehenbailehen berreskuratu dadila, egoera honek ez ditzan langileak gehiago kaltetu».