Abaltzisketako Udalak 7.805,41 euro jasoko ditu hainbat eremutako argiztapena hobetzeko, segurtasuna indartzeko eta espazio publikoaren «erabilera berdintasunezkoagoa eta inklusiboagoa» bultzatzeko. Gipuzkoako sei udalerrik jaso dute dirulaguntza aldundiaren Mugikortasun, Turismo eta Lurralde Antolamendu Departamendutik, hain zuzen, «genero ikuspegidun» hirigintzako jarduerak sustatzeko deialdiaren barruan.
Hari horri tiraka, Abaltzisketako Jon Zubizarreta alkatearekin bildu da Azahara Dominguez Mugikortasuneko, Turismoko eta Lurralde Antolaketako diputatua «bertatik bertara ezagutzeko» herriaren «etorkizuneko proiektu, behar eta erronka nagusiak».
Herria ezagutzen
Jardunaldian Abaltzisketako Logikaline lantegia ere bisitatu dute, zeina espezializatuta dagoen, besteak beste, bezeroarentzako arreta-zerbitzuetan. Diputatuaren esanetan, Logikaline «landa-inguruneko ekintzailetzaren eta berrikuntzaren adibide bat» da, eta gai da eskualdean enplegua eta jarduera ekonomikoa sortzeko eta «bizilagunen bizi-kalitatea hobetzen» laguntzeko.
Era berean, Abaltzisketako Eskola Txikian ere izan da Dominguez, eta alkatearen eskutik ezagutu ditu etorkizunera begira dituzten «kezka eta behar nagusiak». Azkenik, Abaltzisketako Ostatua ezagutu dute, eta egiten duten lana nabarmendu du diputatuak: «Ostatuak gure herrien nortasunaren parte dira, eta funtsezko zeregina betetzen dute gure udalerriak bizirik mantentzeko eta bisitatzen gaituztenei Gipuzkoa egiazkoena hurbiltzeko», adierazi zuen diputatuak.