Jon Zubizarreta Abaltzisketako alkate eta ganaduzaleak behi bat Aralarko larreetan buruan tiroz jota hil diotela salatu du. Maiatzaren 8an jakin zuen gertaera, eta ganadua lau egun lehenago igo zuela Aralarko larreetara argitu du Zubizarretak. Inork mugimendu arraroren bat ikusi izan balu, berarekin harremanetan jartzea eskertuko lukeela aurreratu du.
Ertzaintzan salaketa jarri ostean, eta egoeraren larritasuna ikusita, bideo bidez zabaldu du gertaera. Horrez gain, azken urteetan eman diren hainbat gertaera zerrendatu ditu. "Min handia hartuta nago, eta hau egin duenak badaki zer egin behar zuen", aitortu du. Baina, ez dakiela zergatik egin dioten eta atzean zer dagoen ere gaineratu du.
"Esku garbiekin" eta "babesa" duen bitartean, Aralarren alde lanean jarraituko duela azpimarratu du bideoan.