Abaltzisketara iristeko errepidea jendez gainezka egon da, zaldi lasterketaren azken metroak ikusteko. Xanti Telleria lasartearrak irabazi du proba, Stai zaldiarekin, 3'39ko denbora eginez. Ander Iruretagoiena donostiarra izan da bigarrena, Eusebio zaldiarekin, 3'44'' egin ondoren, eta hirugarrena Eneritz Etxabe zumaiarra izan da, Ibio zaldiarekin, 3'45'' eginez. Guztira 13 parte hartzaile izan dira.
Zaldi lasterketaren sari banaketaren ondoren, herritarren arteko herri kirolak egin dituzte. Ingudean, koxkolak biltzen, korrika, txingak eramaten eta trontzan aritu dira, eta talde urdinak irabazi du. Behin norgehiagoka bukatuta, Elustondo anai-arrebak hasi dira trikiti doinuekin plaza girotzen.