Herriko Txalburu Eskolak gidatuta Abaltzisketako frontoian azoka osatu dute herritar eta kanpotarrentzat: barazkiak eta frutak, eskulanak, etxeko postreak, arropa, brikolaje-erremintak...
Bertaratutakoen arretarik gehien sortu duen postua berriz, egurra mozteko makinarena izan da. Juan abaltzisketarraren makinak bisitarien atentzioa deitu du; egurrak mozteko orduan lana errazten duen tramankulua baita, behin baino gehiagotan bizilagunei utzitakoa dela ere aitortu du Juanek.
Txalburu Eskolako ikasle zein gurasoek herriko eskola txikiarentzako dirua eskuratzeko intentzioarekin ere postua jarri dute gaurko azokan. Ezin ahaztu, abenduaren 28a izanik, Inuzente Eguna, azokan zebiltzaten ume askoren eskuetan eta zenbaiten sorbaldetan "inuzente txotxongilo"ak ere ikusi izan direla.
Eguerdi aldean, abaltzisketarrek frontoian bertan herri bazkaria ospatuko dute eta egunari amaiera emateko, eguna alaitu asmoz bertsolariak eta trikitilariak ariko dira.