Profesionalak eta zikloturistak, Alkizan gora

Itzulia Tolosaldetik igaro da, eta, besteak beste, jende ugari elkartu da Alkizako mendatean, horietatik asko bizikleta gainean igo direnak.

Ziztu bizian egin dute txirrindulariek eskualdetik bidea, eta aurrerapen handiarekin pasatu ere. Ordu erdi lehenago igaro dira Alkizatik, eta mendatean bertan sortu da etapako ihesaldia. Azkenean, baina, aurreko postuetako txirrindulariak izan dira etaparen lehian, eta Erlaitzetik behera aurrera egin du taldetxo batek, tartean gaur sailkapeneko lider jarri den Brandon McNulty bera. Azken esprintean bi euskaldun izan dira borrokan, eta gurpil bat baino gutxiagoko tartearekin Jon Izagirrek irabazi du, bigarren Pello Bilbao izan delarik.

Alkizako gainean txalo ugari eta animo oihu asko jaso dituzte txirrindulariek. Zale asko, gainera, bizikletaz igo du mendatea. Jon Irisarri leaburuarra ez da azkenean ihes eginda pasa eskualdetik, besteak beste, bere taldeko txirrindulari bat ihesaldian sartu delako. Hori bai, animoak ere jaso ditu Caja Rural-RGA taldeko txirrindulariak, tartean Alkizara bizikleta gainean igo diren bere kuadrillakoak, pankarta eta guzti. Irisarriren lagunak, gaur Alkizan ez ezik, bigarren etapan ere izan ziren, La Asturiana mendatean, animoak ematen kuadrillako txirrindulariari.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!