Tolosaldea, arraunaren habi

Errege egunean Tolosaldeko Arraun Klubak 2019ko batel denboraldiko aurkezpena egin du Tolosako Zerkausian, beren etxean. Guztira 117 arraunlari arituko dira urte honetan TAKen izenean arraunean.

Tolosaldeko Arraun Klubaren giltzarrietako bat harrobia da. Tolosako Oria ibaian hazi eta hezi dira, gerora, lehen lerroko tostetan arraun egin duten hainbat eta hainbat arraunlari. Tolosaldea, lehorrean egonagatik, erreferente da bateletan, gazteak arraunlari egiteko lanetan.

Zenbakiek gora egin dute. Izan ere, hazten ari den kluba da TAK. Urtetik urtera zenbaki potoloagoak ematen ditu. Aurten, esaterako, 145 lagunek osatzen dute Tolosaldeko Arraun Kluba. Kategoriaz kategoria jende-kopurua hauek izango ditu aurtengo denboraldiak:

1.       Infantil  eta kimuak (mutilak): 22 arraunlari

2.       Infantil eta kimuak (neskak): 30 arraunlari

3.       Kadete mutilak: 12 arraunlari

4.       Kadete neskak: 19 arraunlari

5.       Jubenil mutilak: 7 arraunlari

6.       Jubenil neskak: 13 arraunlari

7.       Senior neskak: 14 arraunlari 

8.       Entrenatzaileak: 12 pertsona

9.       Kolaboratzaile: 16 pertsona inguru

Lehen asteburuan, etxean

2019ko batel ligako lehen asteburua izango da hurrengoa, urtarrilaren 12-13koa. Denboraldia irekiko duen estropada larunbatean izango da, hilaren 12an, Trintxerpen. Bigarren estropada etxean jokatuko dute Tolosaldeko Arraunlariek. Igandean izango da, urtarrilaren 13an, goizeko 11:00etan.

Infantil eta kimu mailako neska-mutilak arituko dira alde batetik; eta, beste alde batetik, kadeteak. Azken hauek ibilbide luzeagoa egingo dute Oria ibaian barrena.

TAKeko lagunek Tolosaldeko herritarrak lehen pauso horietan eskualdeko arraunlariak animatzera joatea gonbidatu dituzte.

 Ikusi 2019ko estropaden egutegia

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

BATAK BESTEA DAKAR


EGIN ATARIKIDE!