Martxoaren amaieran Ernai eta Aitzina! gazte antolakundeek Gazte Akelarrea antolatu zuten Oiartzunen, Euskal Herri osoko gazteak elkartuz. Formakuntza saioak edota tailerrak izan zituzten, elkar ezagutzeko helburuarekin.
Tolosaldetik joandako gazteek, eskualdean ere gisa horretako egun bat antolatzea erabaki zuten orduan, "Gazte Akelarrean sortutako suak bizirik jarrai zezan". Egun horri Sugarren Eguna deitu diote, eta ekainaren 9an ospatuko dute Amasa-Villabonan. "Gure lana da Euskal Herriko herrietan su txikiak pizten jarraitzea gazteon borrokak aurrera jarrai dezan", azaldu du Ernaik ohar baten bidez.
Sugarren Egunean, bi mahai-inguru izango dituzte goizean: lehenik eta behin emakumeek espazio publikoan dituzten arazo eta erronkei buruz hitz egingo dute Oihana Iguaran, Itziar Gastearena eta Haizea Nuñezen eskutik. Ondoren, ziklo politiko berriari buruz hausnartuko dute Haimar Altuna eta Maddi Isasirekin.
Gero bazkaria egingo dute, eta horretarako txartelak salgai dira Tolosako Amaiur, Anoetako Itzuli, eta Billabonako Iratzar tabernetan. Arratsaldea, berriz, bertso poteoarekin alaituko dute, Maialen Akizu eta Eli Pagola bertsolarien laguntzarekin. Eta egunari amaiera emateko, ekainaren 10ean Gure Esku Dagok deitu duen giza kateari babesa erakusteko argazkia aterako dute.