Beñat Sarasola Gure Esku Dagoko kideak azaldu duenez, "herri ekimena izanik, herria astindu nahi izaten dugu eta gaurkoan, ikasturteari hasiera emateko, herritarrak gonbidatu ditugu elkarretaratzera. Kataluniaren herriari babesa emateko".
Astelehenean Katalunian "egun handia" izango dela gaineratu du Sarasolak, Diada gogora ekarriz, "eta gaur egun ikusirik ze mugimendu dabiltzan, seguru gaude arrakastatsua izango dela. Eta arrakasta horri eutsirik guk ere deialdia luzatzen dugu herritar guztioi irailaren 16an Bilbora azaldu eta Bilbon ere manifestazio erraldoi batekin Kataluniari gure babesa eskaini diezaiogun".
Gogora ekarri du manifestazio horretara joateko Tolosaldetik autobusak antolatu direla eta bertarako izena emateko deialdia luzatu du. "Autobusez joan ezin duenak, kotxez joan dadila. Ea denok Bilbon elkartzen garen eta egun hori ere historikoa izaten den", esan du Sarasolak.