Tolosaldeko energia diagnosiak emandako datu kezkagarrien aurrean, kontzientziazio bideoak hedatu ditu Tolosaldea Piztuk. Helburuak, energia-iturrien eta kontsumoaren inguruko datuak ematea, eta jendearen konpromiso eta sentsibilizazioa lortzea dira. Bideoak Facebook eta Youtube bitartez zabaldu dituzte.
Gipuzkoako Foru Aldundiko Ingurumena eta Obra Hidraulikoen departamentuarekin elkarlanean, Tolosaldeko egoera energetikoaren diagnosi bat egin zen. «Emaitzak, Euskal Autonomia Erkidegoaren antzera, ez ziren pozgarriak izan», azaldu dute Piztu Tolosaldea proiektutik. Aipatu informazioaren berri emateko, energia kontsumoaren inguruan sentsibilizazioa lortzeko bi bideo zabaldu ditu Piztu Tolosaldeak. Lehenengoa, Tolosaldeko energia datuak aurkeztuz: zein energia-iturri erabiltzen dugun gehien, menpekotasunaren inguruko datuak... Bigarrena, berriz, pobrezia energetikoaren ingurukoa da. «Uste baino gertuago daukagu pobrezia energetikoa, eta Gipuzkoako datuak kezkagarriak dira», zehaztu dute. Piztu Tolosaldeak kasu horretan bizi diren familiei «arazo honen aurrean ez daudela bakarrik» helarazi nahi diela jakinarazi du.