Xabier Albizu antolakuntza lanetan aritzen da eta berak azaldutakoaren arabera Alegian leku "bikaina" topatu dute kanporaketa hau jokatzeko. Goizean azpiegitura guztia prestatzen aritu dira eta arratsaldean 15:00etan zozketa egin eta ekin diote gaurko kanporaketari.
Gipuzkoan 750-800 bikote inguruk parte hartzen dute herriz herri egiten den kanporaketarekin. Aurten 115 bikote iritsi dira Alegiara eta aipatu bezala horietatik 32 besterik ez dira Urdiñarbeko final handira iritsiko. Herrialde bakoitzeko bikote kopuru proportzionala joaten da final horretara: 32 bikote Gipuzkoatik, 32 Nafarroatik, Arabatik 18, Bizkaitik 12, Lapurditik 12, Nafarroa Beheratik 14 eta Zuberoatik 8. Guztira 128 bikote ariko dira, hortaz, Urdiñarben.
Mus Txapelketa honen helburuari dagokionez, Albizuk dio musa Euskal Herrian sortutako jokoa denez, "jokoarekin ere Euskal Herria sortzen" lagun dezaketela. Mundu mailako txapelketa Espainia, Frantzia edo Uruguai bezalako herrialdeetatik abiatuta egiten da, eta Albizuren esanetan hemen sortua denez "ezin da besteen eskuetan utzi" eta Euskal Herrikoa bertakoa antolatu beharra dago.