Oier Iribarren San Filippo gaixotasuna duen ibartarraren alde eskualdeko 28 herriak zeharkatu zituzten larunbatean, Luis Lasa eta Juan Zubia ibartarrak, beste hainbat korrikalariren eta herritarren laguntzarekin. Helburua bi lasterkariak herri bakoitzetik igarotzean diru bilketa egitea zen, eta 5.000 euro biltzea lortu zuten.
05:00etan euripean abiatu ziren korrikalariak Ibarratik, eta 20:00ak pasatxo zirenean iritsi ziren Ibarrara. Oier eta bere familia Ibarrako kultur etxearen parean zituzten, pankarta handi bat eskuan zutela, eskerrak emateko zain. Guztiak elkartu ostean, plazaraino elkarrekin jaitsi ziren, atzetik jende mordoxka zutela. Plazan txalo artean sartu ziren eta udaletxe azpiko arkuan atera zuten familia argazkia. Ondoren, Alurr dantza taldeko dantzariek agurra dantzatu zieten Oierri eta bere familia guztiari. Korrikalariei txapelak eta oroigarriak banatuta, antolatzaileek eskerrak eman nahi izan zizkieten Ibarrako plazan bildu ziren ibartar eta eskualdeko herritar guztiei.
Ekitaldia amaitu ostean, Ibarrako merkatarien elkarteko kideek antolatutako pintxo potean, jan eta edana ere bazegoen jada gosea egina zuenarentzat.
Elkartasun kilometroa
Ibarran Oier Iribarrenen aldeko beste ekitaldi bat ere izango da bihar bertan. Izan ere, Uzturpe Ikastolak urtero egiten duen Elkartasun Kilometroa, aurten, Stop Sanfilippo elkartearentzat izango da. Bihar, asteartea, egingo dute Elkartasun Kilometroa 15:00etatik 16:30era. Ibarrako plaza eta San Inazio artean prestatu duten zirkuitoan ariko dira haurrak.
Era berean, Ibarrako Hauspoa elkarteak kontu bat ireki du diru ekarpenak egiteko, eta maiatzaren 10a arte egin ahalko dira. Hau da kontua: Euskadiko Kutxa 3035 0141 89 1410022109.