Zazpi sail ditu garapen agentziak, eta horietako bakoitza islatzen du irudi berriak: enplegua, enpresak, udalak, turismoa, ekintzaileak, aniztasuna eta kontsumo bulegoa.
Esparru zabal horietan jarduten du bere egunerokoan Tolosaldea Garatzenek, eta guztien batura irudikatzen du markak. Are gehiago, sail bakoitzak bere irudi eta kolore propioak ere izango ditu, are identifikagarriagoak egiteko.
Komunikazio lan sakonago baten abiapuntua da hau. Bizi dugun egoera konplexuan, erakunde, enpresa eta herritarrok eskura dituzuen baliabide guztien berri izatea are garrantzitsuagoa delako orain. Hori guztia gerturatu nahi dizuegu.
'tolosaldeagaratzen.eus' itxura berria, funtzionaltasun gehiago
Herritar eta enpresen eskura dauden baliabide eta proiektu guztien inguruko informazioa bilduko du web orri berriak. Baina izango ditu erabilgarriak diren beste hainbat funtzionaltasun ere. Adibidez:
· Lan eskaintza eta lan poltsen zerrendak
· Enplegu Sailera curriculumak bidaltzeko aukera
· Lehiberri Forora eta Tolosa Gourmet klubera atxikitzeko aukera
· Enpresek garatutako proiektuen informazioa
· Ekintzaileen direktorioa
· Lehiberriko aretoak alokatzeko aukera