Istorioak

Aftersun. Zaindu beharreko eta askorik zaindu gabeko baratzeak. Tomate preziatuak. Urre gorria. Itsaso infinitua eta mendiaren berdeak. Gailur ahaztuak eta kostata igotakoak. Leku exotiko, ezezagunak, munduaren azken punta edota betiko apartamentua. Jende oldea. Turistak. Langabezia disimulatua eta lan prekarioak. Zerbitzari estresatuak eta prezio garestiegiak. Gosari berantiarrak eta beldurtzerainoko buffetak. Lasai. Desorduak. Koloreak alde guztietatik. Kontsumismoa. Abuztua egin nahi duten merkatari eta saltzaileak. Kapitalismoaren klimaxa. Kapritxo eta gutiziak, gaur eta bihar. Festak eta San Auskalo guztiak. Aste Nagusiak. Gauaren errege eta erreginak. Ligoteo sanoa (ze bestela ez da ligoteoa!). Ustekabean hartutako mozkorraldia edo planifikatu gabeko sasi-parranda. Merezi gabeko ajeak. Oroitzapenak. Derrigorrezko argazkiak. Sare sozialen eztanda. Exhibizionismoa eta erakutsi beharra. Gorputz perfektu edo eroritako ipurdiak. Errealak. Kilo batzuk hartzearen ardura baina aldibereko felizidadea. Albistegien bete lana. Berri absurdo eta aurpegi berriak. Hemen bero eta han beroago. Desinformazioa. Munduak berdin aurrera baina zer axola. Errefuxiatu andana eta mugak. Itsasoan hondoratutakoak edo errepidean geratutakoak. Bortxaketak. Despedidak eta agurrak. Ongietorriak. Berriz elkartzeak. Hainbeste itxarondako besarkadak. Bustitako begiak. Umeen irribarre inozentea. Udan hartutako seme-alabak. Konpainia. Bidelagunen babesa eta edertasuna.

Uda: zenbateraino eman diguzu... Hain gutxi eta hain askorako. Zure baitan zenbat istorio, zenbat bizitza. Zutaz gozatzeko zortea izan dut, zugandik bueltatzekoa. Gogo onez itxarongo dizut, ez zarelako betierekoa. Zorionez.