Denbora, oparirik garestiena

Erabiltzailearen aurpegia Olatz Peñagarikano 2017ko urr. 29a, 18:41

Jaieguna da. Haize freskoak argi uzten du udazken betean gaudela, baina urriko eguzki printzek kanpora ateratzeko gonbita egin digute. Eta gu esaneko, jai egunaz gozatzera. Eguerdi partean nonahi ikus daitezke ardo kopak edo bermutak, eta, jakina, baita pintxoren bat ere. Ia astebururo errepikatzen den egoera izanagatik ere, bakan batzuk sentituko dira pribilegiatu. Izan ere, batzuon libertimendurako beste askok lan egin behar dute. 

Zenbaitetan, ordea, egoera hori are nabarmenagoa izan ohi da, herrian antolatzen diren jai edo ekimenak kasu. Batzuek auzolana deituko diote, beste batzuek herrigintza, edo baita elkarlana ere. Hartzen duen izena hartzen duela ere, helburua bera da: norberak bere aletxoa, bere denbora eskaintzea ingurukoen gozamenerako, eta, gainera, musu truk.

Hortxe dago koska, doako laguntza dela. Eta sentsazioa dut gero eta gehiago kostatzen zaigula debalde laguntzea. Nork ez du entzun txosna turnoak osatzeko jendea falta dela? Edo bazkaria zerbitzeko ezin osatu hori? Edo trafikoa bideratzeko baten bat falta dela?

Ezin da ukatu oraindik orain herri eskuzabala garena, adibide argiak dira orain gutxiko Nafarroa Oinez edo Kilometroak jaiak, esaterako. Eskerrak zorioneko boluntario horiei! Ziur naiz denok ezagutzen dugula gure herriaren alde edozer egiten duen hori, plaza erdian monumentua merezi duen hori (edo horiek). Atzeko lanak egiten dituztenak, itzalpean daudenak, isil-isilik dihardutenak. Eta askotan, eskerrak ere ez genizkion / genizkien emango. Neroni ere zaku horretan sartzen naiz, eta lotsa sentitzen dut.

Herri bizi batean bizi nahi badugu, herriak aurrera egitea nahi badugu, guztiok egin beharko genuke ahalegin txikia, ahal dugunean, bederen. Izan gazte, ez hain gazte edo heldu. Teoriak ondo barneratu ditugun arren, gehiago ematen ikasi beharko genuke, trukean ezer jaso gabe. Eta hori ez bada gurea, gutxienez eskerrak ematetik has gaitezke, zer gutxiago.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!