Kale Kantoitik

Gau Beltza Baliarrainen

Erabiltzailearen aurpegia Mikel Ozaita 2018ko urr. 31a, 17:25

Urriaren 31a, gaurko iluntzea. Baliarrainen lehen aldiz Gau Beltza ospatuko dute. Jai egun arrotzen eta komertzialen aurrean, jai kontzeptuari buelta eman, etxekotu eta egitarau oparoa antolatu dute baliandarrek, iluntasuna eta beldurra ardatz hartuta.

Gaztain jatea, kalabazekin herria apaintzea, herriko argien itzaltzea, beldurren erretzea, kanpaiak jotzea, puska biltzea etxez etxe kopeizko lanparekin, afari herrikoia eta beldurrezko ibilbidea antolatu dituzte, besteak beste. Egitarau osoa eta oparoa. Baldintza bakarra, etxeko arropa zaharrekin mozorrotzea.

Ospakizun berri honek, hainbat osagai interesgarri ditu bere baitan. Antolakuntzako pisu handia herriko 4 gaztetxok hartu dute, komunitateari ekarpena eginez eta herriko haurren eredu izanez. Puska biltzearekin herriko kohesioa landuko dute, 20 etxe eta baserri inguruk parte hartuko baitute elikagaien eskaintzan. Beldurra, iluntasuna eta heriotzaren inguruan hausnartuko dute, biziaren parte ere baitira. Eta ez du aurrekonturik izango, ez antolakuntzari dagokionez, ezta mozorrotzeko ere.
Erritu berri honek aurten arrakasta izaten badu, beharbada, tradizio bilakatuko da etorkizunean. Funtzio sozial esanguratsurik betetzen badu, etorkizuna ziurtatuta izango du.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!