Ordenaren parodia

Erabiltzailearen aurpegia Ion Mintegiaga 2020ko ots. 15a, 08:57

Wikipediari begiratua bota eta hortxe topatu dut nire intereserako hari mutur aproposa. Inauterien ezaugarri berezia omen da, parodia eta satira giroan, «gizarte ordena urratu eta alderantzikatzea». Ederra iruditu zait.

Izaki sozialak garen heinean inguruneari atxikita eta erne bizi gara, gaizki doana hobetuko dugun asmotan, gaizki joanarazten dutenak noizbait gaindituko ditugun esperantzan. Eta akaso ene prisma subjektiboa izango da, baina ustea badut ez ote diren figura batzuk errebindikatzen eta beste batzuk irrigarri uzten. Che Guevara, Puigdemont, mendigoizaleak, sobietarrak, etab. goratzen; eta, azkenaldian, Tolosaldean hain presente dugun Guardia Zibila, Raxoi, Trump, bankeroak, popeak eta enparauak erridikulizatzen. Instintuz.

Edonola, egunerokoari desordena gailentzen zaio. Lagunak gertuago, ardurak urrutiago, mozorroak babesturik barrenak askeago. Pausa bat. Puntu eta jarrai.

Eta presoak? Eten honetan parterik izaten ote duten? Beste bat loturik deino ez gara libre izango, ziur. Bada maite eta gogoratzen dituztenik, aske nahian.

Garizuma bezpera baino data hoberik ez zait okurritzen herri sagardotegi bat antolatu eta txandan-txandan ekarpena egiteko, drama serioa dena jai giroan txertatu eta aldarrikatzeko.


Zertaz mozorrotuko ote dira aurten? Kartelaren zain izaten gara irrikatan.

Bitartean berriz, txootx!!

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!