Etxean egoteko moduko giroa

Erabiltzailearen aurpegia Iker Ibarluzea 2019ko aza. 15a, 05:58

Negu bete beteko eguraldia izango dugu gaurkoan. Egun guztian zehar hodeiak nagusituko zaizkigu eta zaparradak etenik gabeak izan daitezke. Gainera, goietan aire hotza egongo da eta lehen orduetan kazkabarra botatzeko arriskua egongo da. 

Haizeak ipar mendebaldetik joko du, eguerdira arte indar dezenterekin, eta ondorioz, tenperaturak oso hotzak izango dira; gehienez jota 7-8 gradutara iritsiko dira. Elur maila jaitsi egingo da 600-800 metrotara.

Asteburuan ere giro kaxkarrarekin jarraituko dugu.

Larunbatean, giro euritsua izango dugu, batez ere, egunaren bigarren zatian. Litro dezente pilatuko zaizkigu. Tenperaturek hotzak izaten jarraituko dute, gehienez 8 gradutara iritsiz. Elur mailak antzeko balioetan jarraituko du, baina arratsaldean zertxobait gora egingo du 1.000 metro ingurura.

Igandean, antzeko giroarekin jarraituko dugu baina tenperaturak gora egingo duenez elur mailak ere gora egingo du. Eguerdi partean lasaialditxo bat izango du eguraldiak, baina ondoren, beste fronte batekin berriz ere euri asko botako du. Tenperaturak 9-10 gradutara iritsiko dira eguneko erdiko orduetan.

Astelehenean oraindik ere giro euritsuarekin jarraituko dugu. Lehen zatian zaparrada mardulak eta nahiko etengabeak izango dira. Ondoren, arratsalde partean arintzen hasiko da eta eguna bukatzerako ahulak izango dira zaparradak. Tenperaturak antzeko balioetan mugituko dira, eta elur maila 1.000-1.200 metrotan kokatuko zaigu.

Ondoren, joera aldaketa bat izango dugula dirudi. Hego haizea sartuko zaigu indartsu. Tenperaturek gora egingo dute, baina aste erditik aurrera borraska berri batek euria ekarriko du berriro.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!