Nola lortzen dituzu baliabide ekonomikoak zure lanak ekoizteko?
Bideoklipen kasuan, enkargu bat denez, nik ez dut dirurik jartzen. Film laburrei dagokienez, mesedeak eskatuz… nazkatzen zaren arte. Jendeari ondo ordaindu nahi diot bere lanagatik, baina zaila da. Zure lanen bat jaialdietara bidali nahi baduzu langileak kontratatuak izatea exijitzen dizute.
Diru laguntzarik sekula eskatu duzu?
Momentuz ez, baina egingo dut. Oraingoz, ekoiztetxe bati saldu nahi diodan film labur bat dut eskuartean.
Plataforma batek zure lanen bat ekoitziko balu, kalitate artistikoa handitzearen sinonimoa litzateke?
Ez du zertan. Bada esaldi bat zera dioena: «Mundu guztiak ezagutzeak ospea ematen dizu, inporta dutenek ezagutzeak prestigioa». Adibidez, Netflixek eskaintzen dituen produktu asko oso mainstream dira eta zeure buruari galdetzen diozu nola iritsi den fikzio hori plataforma horretara. Hori bai, bertan lana egiteko aukera banu zalantzarik gabe egingo nuke.
Beraz, plataforma baten presentziak bultzada emango lioke zure lanari.
Noski, nazioarteko mailan kokatzen zaitu. Badut lagun bat Filmin plataforman hiru film dituena, baina estilo oso independentea dute eta ez dakit bertatik bizitzeko nahikoa diru bereganatzen duen.
Plataformen agerpenak nolako eragina izan du zinemagintzan?
Zinema prostituitu egin dela iruditzen zait. Produktu mainstreamak egiten dira gehienbat, saltzeko pentsatuta daudenak eta lan asko egin nahi baduzu horrelako zerbait egin beharra daukazu. Zinema independenteak badu bere bidea, baina laburragoa dela iruditzen zait.
Non ikus ditzakegu zure lanak?
Vimeo plataforman dauzkat lan gehienak.